Poet
sitam hai tere ashiq ke liye bimar ho jaana
badi aafat hai dal ke haath se na-char ho jaana
badal jaana nigahon ka to dekha par nahin dekha
dil-e-ashiq se us ka tiir ban kar paar ho jaana
nasihat se vo baaz aata nahin tum baaz aaoge
pahunchna samne naseh ke jab sarshar ho jaana
kiya hai ashk-e-hasrat tu ne rusva mujh ko mahfil men
kaha kis ne ki yuun mere gale ka haar ho jaana
akele men tasavvur khuub karna us sitam-gar ka
lahad men khvab-e-ghaflat se agar bedar ho jaana
dil-e-pur-gham raqib ru-siyah dekhe nahin tujh ko
gali men us ki ja kar saya-e-divar ho jaana
nahin furqat gavara tair-e-dil tum ko dilbar ke
pahunchte hi asir-e-gesu-e-kham-dar ho jaana
khuda hafiz hai apna dekhiye kaisi guzarti hai
badi mushkil hai rah-e-ishq ka dushvar ho jaana
qadam-bosi mayassar ho kisi surat se us but ki
‘jamila’ baad-e-murdan khak-e-ku-e-yar ho jaana
Leave a Reply