adeem-hashmi

Gham Hai Wahin Pa Gham Ka Sahaara Guzar Gaya

gham hai vahin pa gham ka sahara guzar gaya

dariya thahar gaya hai kinara guzar gaya

bas ye safar hayat ka itni si zindagi

kyuun itni jaldi rasta saara guzar gaya

vo jis ki raushni se chamakna tha bakht ko

kis asman se vo sitara guzar gaya

kya zikr us ghadi ka kadi thi ki sahl thi

jo vaqt jis tarah bhi guzara guzar gaya

tafhim-e-dosti men badi bhuul ho gai

phir duur se hi dost hamara guzar gaya

kar ke yaqin phir se ki main mushkilon men huun

thahra nahin vo shakhs dobara guzar gaya

ik vaqt khush-nasib sa aaya to tha ‘adim’

maddham si ik sada men pukara guzar gaya

mujrim hua tha aankh jhapakne ka main ‘adim’

jo zehn men basa tha nazara guzar gaya

More Poems

Leave a Comment