kuchh is tarah se tasavvur men aa raha hai koi
charagh ruuh men jaise jala raha hai koi
koi kalim uThe varna intizar ke ba.ad
charagh-e-tur-e-mohabbat bujha raha hai koi
vo dair ka tha ki ka.abe ka ye nahin ma.alum
miri ḳhudi ka muhafiz ḳhuda raha hai koi
jo rokna ho to aa baḌh ke rok le varna
tire hudud-e-taghaful se ja raha hai koi
ravan-davan nahin be-vaj.h karvan-e-hayat
mujhe zarur kahin se bula raha hai koi
badal rahe hain jujun-o-ḳhirad ke paimane
kis ehtimam-e-taghayyur se aa raha hai koi
na kuchh malal-e-asiri na ḳhatra-e-sayyad
qafas samajh ke nasheman bana raha hai koi
zamin-o-charḳh ne inkar kar diya jis se
vo baar dosh-e-vafa par uTha raha hai koi
jahan-e-nau men ba-rang-e-kashakash-e-paiham
hayat-e-nau ke saliqe sikha raha hai koi
ḳhabar karo ye haqa.eq ke pasbanon ko
majaz kho ke haqiqat men aa raha hai koi
na jaane kaun si manzil men ishq hai ki mujhe
mire hudud se bahar bula raha hai koi
Daro ḳhuda se baḌa bol bolne vaalo
qarib ham se bhi be-intiha raha hai koi
mujhe sitam men izafe ka gham nahin lekin
yaqin kar ki mire ba.ad aa raha hai koi
nigah-o-lab men hansi ki sakat nahin lekin
ba-jabr-e-ishq-o-vafa muskura raha hai koi
ye sub.h-o-sham ki yurish ye mausamon ki ravish
ki jaise mere ta.aqub men aa raha hai koi
kisi ko is ki ḳhabar hi nahin thi kuchh ‘ehsan’
ki miT ke apna zamana bana raha hai koi
Leave a Reply