aa ki hasti be-lab-o-be-gosh hai tere baghair
ka.enat ik mahshar-e-ḳhamosh hai tere baghair
aa ki phir dil men nahin uThti koi mauj-e-nashat
sard paani bada-e-sar-josh hai tere baghair
niind aa aa kar uchaT jaati hai teri yaad men
tar-e-bistar nashtar-e-aghosh hai tere baghair
jalva-e-har-roz jo har sub.h ki qismat men tha
ab vo ik dhundla sa ḳhvab-e-dosh hai tere baghair
zindagi tujh se ibarat thi magar jab tu nahin
zindagi ka apni kis ko hosh hai tere baghair
aa ki mauzu-e-ghazal ko DhunDhti hai har nigah
naghma-e-mutrib bala-e-gosh hai tere baghair
kya ḳhabar ‘simab’ kab ghabra ke de de apni jaan
zabt go ab tak tahammul-kosh hai tere baghair
Leave a Reply