Irfana Azeez
mutarannim hai miri ruuh men yuun teri sada
absharon ki sukun-rez ravani jaise
nur-o-nik.hat men nahaya hua vo tera kalam
rud-e-kausar ka chamakta hua paani jaise
meri palkon pe hain yuun gauhar-e-shabnam ghaltan
mere honTon pe ho phulon ki kahani jaise
mere sanson men machalti hai hina ki ḳhushbu
teri nau-ḳhez mohabbat ki nishani jaise
kitna ḳhush-rang hai ma.asum tabassum tera
muskurati ho baharon ki javani jaise
bas gaya mere tasavvur men hayula tera
zehn-e-sha.ir men koi yaad suhani jaise
dil ke angan men ubharta hai tira aks-e-jamil
chandni-rat men ho raat ki raani jaise
Leave a Reply