Ahmad Rahi
vaqt hairan nigahon se mujhe dekhta hai
dekh kar haal ko shayad use maazi ka khayal aata hai
vaqt jab bhi kisi zartab o hasin maazi ke gahnae hue
haal se do-char hua kaanp utha
us ko maalum nahin hai maazi
kis tarah haal ke sanche men bigad jaata hai
tu magar janti hai
talkhi-e-zist damakte hue shadab o javan chehron ko
kaise afsurda-o-pazhmurda bana deti hai
kisi tarah sham-e-khizan sub.h-e-baharan bikhar jaati hai
tu mujhe dekh kar hairan na ho
main vahi huun tu jise hasil-e-ummid kaha karti thi
main vahi huun tu jise pahle-pahal dekh ke chaunk utthi thi
aur ab dekh ke ye haal mire maazi ka hairan hai tu
dekh hairan na ho
vaqt hairani pe majbur hai maalum nahin hai is ko
maazi kyuun haal ke sanche men bigad jaata hai
aur tu vaqt nahin
Leave a Reply