Shab-E-Firaq Ko Jab Muzhda-E-Sahar Aaya

shab-e-firaq ko jab muzhda-e-sahar aaya

to ik zamana tira muntazir nazar aaya

tamam-umr ki sahra-navardiyon ke baad

tira maqam sar-e-gard-e-rahguzar aaya

ye kaun abla-pa is taraf se guzra hai

nuqush-e-pa men jo phulon ke rang bhar aaya

kise majal ki nazzara-e-jamal kare

is anjuman men jo aaya ba-chashm-e-tar aaya

tiri talab ke ghane jangalon men aag lagi

mire khayal men jab vahm-e-rahguzar aaya

simat gaya miri bahon men jab vo paikar-e-rang

to is ka rang mujhe duur tak nazar aaya

is arizon men ki zid kibriya ki puuri ho

‘nadim’ khaak pe aflak se utar aaya

Leave a Comment