to vahan ja ke bachega dil-e-hoshyar ghalat
un ki nazron ka ḳhata hota hai kab vaar ghalat
ye to huron ka talabgar hai din-dar kahan
bandh ga.i shaiḳh ke sar bhule se dastar ghalat
do hi fiqron men vo aghyar ke ban baiThe hain
nama-bar un ko batata hai jo hoshyar ghalat
Thokaren kha ke hi insan bana karta hai
zindagi ishq men ho ja.egi yuun ḳhvar ghalat
us ke didar ki ummid dobara kaisi
kahin hoti hai tajalli ko bhi takrar ghalat
vo mujhe puchhte paigham-rasa jhuuT na bol
ye bayan tera sarasar hai mire yaar ghalat
ishq ka josh sahi hausla ye ham men kahan
un se kuchh arz karenge sar-e-bazar ghalat
‘shad’ hai naam vo dil shaad raha karta hai
vo bhala ro.ega ja kar pas-e-divar ghalat
Leave a Reply