Poet
haath se chhu kar ye niila asman bhi dekhte
jo ufuq ke paar hain vo bastiyan bhi dekhte
mutma.in hain jo bahut khulte dariche dekh kar
vo kisi din band hoti khiḌkiyan bhi dekhte
is ḳharabe men bhi mumkin hai koi abad ho
ik nazar andar se ye ujḌa makan bhi dekhte
aaj jis tan par nazar aati hai zaḳhmon ki qaba
kal usi tan par libas-e-parniyan bhi dekhte
sirf aḳhbaron ki surḳhi tak rahi jin ki nazar
kaash vo chehron pe likkhi dastan bhi dekhte
khinch laa.i hai jinhen is dar pe sho.alon ki tapish
kaash vo is ghar pe manDlata dhuan bhi dekhte
zaḳhm siine par to ‘rashid’ sah liya ham ne magar
tiir ye jis se chala tha vo kaman bhi dekhte
Leave a Reply