Aslam Mahmood
mizha pe ḳhvab nahin intizar sa kuchh hai
bahar to nahin aks-e-bahar sa kuchh hai
mujhe mila na kabhi farsh-e-gul pe bhi aram
yahi laga ki kahin nok-e-ḳhar sa kuchh hai
jo paas tha isi sauda-e-sar ki nazr hua
na dhajjiyan hi bachi hain na taar sa kuchh hai
tamam umr jise main ubuur kar na saka
darun-e-zat mire be-kanar sa kuchh hai
guzar ga.i mujhe chhu kar kisi ḳhayal ki rau
ufuq se ta-ba-ufuq rang-zar sa kuchh hai
ḳhayal-o-ḳhvab hue sab visal ke lamhe
nazar men sirf chamakta ghubar sa kuchh hai
ye haal hai ki havaon se uljha jaata huun
lahu men ab ke ajab intishar sa kuchh hai
Leave a Reply