kyuun ho na gir ke kasa-e-tadbir paash paash
hai sang-e-gham se shisha-e-taqdir paash paash
hai khun-e-be-gunah se jigar resh-e-tegh bhi
jauhar nahin ye hai tan-e-shamshir paash paash
tir-e-nigah ne dil mira ghirbal kar diya
zakhmon se ho gaya tan-e-nakhchir paash paash
tegh-e-zaban-e-yar se majruh hai jigar
hota hai dil mira dam-e-taqrir paash paash
ai tegh-e-kalik likh vo mazamin-e-taaniya
dil hasidon ke hon dam-e-tahrir paash paash
‘zeba’ ghazal to tum ne kahi is zamin men khuub
sabit har ik jagah hai ba-tadbir paash paash
Leave a Reply