ye bhi shayad tira andaz-e-dil-ara.i hai
ham ne har saans pe marne ki saza paa.i hai
kaisa paigham kahan se ye saba laa.i hai
shaḳh-e-gul sub.h-e-baharan hi men murjha.i hai
dil ke abad ḳharabe men na shab hai na sahar
chandni le ke tiri yaad kahan aa.i hai
tu mire chak-e-gareban se to mahjub na ho
main ne kab teri mohabbat ki qasam khaa.i hai
tujh ko is tarah bhi dekha hai miri ankhon men
teri avaz ki tasvir utar aa.i hai
teri mahfil men ki maqtal men kahin dekha tha
zindagi se miri bas itni shanasa.i hai
kya tira haal bhi ai anjuman-ara hai yahi
main tire paas huun lekin vahi tanha.i hai
Leave a Reply