Shahid Jameel
har tarah ham hi tire saath hue jaate hain
phir bhi ham hi se savalat hue jaate hain
kis ko fursat hai yahan jo tujhe soche din-rat
ek ham hain tire din-rat hue jaate hain
ek to ham ne hi kam kar diya milna-julna
aur kuchh log bhi mohtat hue jaate hain
hijr ne ab ke baras tai kiye lamhe kya kya
fasle bazm-e-mulaqat hue jaate hain
aankh ko kya kisi manzar pe bharosa na raha
ḳhvab sab nazr-e-ḳharabat hue jaate hain
Leave a Reply