mayusi ki kaifiyyat jab dil par taari ho jaati hai
rafta rafta din-o-duniya se be-zari ho jaati hai
avval avval ḳhush aata hai pariyon ke ḳhvabon men rahna
ba.ad men lekin ye halat zehni bimari ho jaati hai
aql pe parda paḌ jaata hai aur ham sab kuchh kho dete hain
jab koi shaḳhsiyyat ham ko had se pyari ho jaati hai
rizq muqaddar men likha hai phir ye karobar-e-jahan kya
ik ik daana kamane men kis darja ḳhvari ho jaati hai
ba.az maqam aise hote hain jin se aage baḌh jaa.en to
un tak vapas aane men behad dushvari ho jaati hai
ham to she.ri canvas par bas dil ka haal raqam karte hain
sachche jazbon se is par ḳhud naqsh-nigari ho jaati hai
aksar mujh se mahinon ‘kashif’ koi sher nahin ho paata
taaza zaḳhm magar lagte hi taza-kari ho jaati hai
Leave a Reply