ḳhashak se ḳhizan men raha naam baagh ka
varna to har daraḳht pe qabza hai zaagh ka
hairat hai sab talash pe us ki rahe musir
paaya gaya suragh na jis be-suragh ka
hai irtikaz-e-zat men vaqfa zara si der
TuuTa nahin hai rabta lau se charagh ka
kab kis pe mehrban ho aur kab ulaT paḌe
kis ko yahan pata hai kisi ke dimagh ka
hota hai phir vo aur kisi yaad ke supurd
rakhta huun jo sambhal ke lamha faragh ka
mashq-e-suḳhan men dil bhi hamesha se hai sharik
lekin hai is men kaam ziyada dimagh ka
Leave a Reply