Poet
kisi se kaise kahe koi tajraba dil ka
ajiib saneha hota hai saneha dil ka
kahin na phunk den sho.ala-badan mata-e-sukun
chala hai shahr-e-nigaran ko qafila dil ka
mah-o-nujum miri gard-e-rah pa na sake
mah-o-nujum se aage tha hausla dil ka
asir-e-kakul-e-lala-ruḳhan vo kya hota
salib-o-dar-o-rasan se tha rabta dil ka
vo meri arz-e-tamanna pe talib-e-jan hai
hai ik ajiib sitamgar se vasta dil ka
ye nukta junun hi samajh sake pasha
bahut tavil ḳhirad se hai fasla dil ka
Leave a Reply