Poet
kal zindagi ke ḳhvab ki ta.abir mil ga.i
thi jis ki mujh ko justuju vo hiir mil ga.i
apni dua pe tha mujhe kuchh is qadar yaqin
mangi ḳhuda se jo vahi jagir mil ga.i
jo log be-vaqar se phirte the shahr men
mere sabab se un ko bhi tauqir mil ga.i
barsen vafa ke chand ki kirnen kuchh is tarah
be-nur anganon ko bhi tanvir mil ga.i
qirtas-e-zindagani pe dekha jo ghaur se
tujh jaisi hu-ba-hu koi tasvir mil ga.i
hathon ki ulTi sidhi lakiron ko dekh kar
vo shoḳh kah raha tha ki tahrir mil ga.i
Leave a Reply