pukara nit-na.e mehvar badalne valon ne
palaT ke dekha na lekin sambhalne valon ne
kiya na ek bhi pal ke liye qayam kahin
zamin ki ḳhaak pe sadiyon se chalne valon ne
nazar se aa.i sada-e-shikast-e-ḳhvahish-e-qurb
baḌha.e haath agar haath malne valon ne
qubul kar liya har da.ere ki davat ko
hisar-e-jabr se bahar nikalne valon ne
mire vajud ke ḳhurshid ki shuaon ko
sula diya hai andheron men jalne valon ne
vo ḳhauf kya tha ki jis ke nuzul par ‘ḳhalid’
kaha na kuchh bhi bahut kuchh ugalne valon ne
Leave a Reply