Saif Zulfi
mahka hai zaḳhm zaḳhm hava.en hain manchali
barsa hai teri yaad ka savan gali gali
divar-o-dar to raah men haa.il na ho sake
aage baḌhun to paanv pakaḌti hai bekali
ik mahtab tha ki pighalta chala gaya
ik sham.a thi ki saath mire raat bhar jali
vo raushni jo tu ne hamen di thi din Dhale
vo raushni bhi ham ne luTa di gali gali
ye aur baat ham hi ujalon se duur hain
varna hamin ne teri jabin par shafaq mali
saa.e ka ik naqab sa ruḳh par bikhar gaya
yaaro sahar jo us ke gareban se Dhali
shoa.la-fishan hai shiddat-e-idrak se badan
ik karb ke alaav se divangi bhali
lau de uThi hain biite dinon ki rifaqaten
bujhte sharar bhi aag bane vo hava chali
Leave a Reply