Rasheed Lakhnavi
agar gul ki koi pati jhaḌi hai
to sau sau baar bulbul gir paḌi hai
nazar kya jaa.e su-e-shisha-o-jam
hamari aankh saaqi se laḌi hai
ye hai josh-e-bahar un ke chaman men
ki har ik shaḳh phulon ki chhaḌi hai
suni rif.at sulaiman ki to bole
hamari ik anguThi gir paḌi hai
tumhari zulf se kam hai shab-e-hijr
magar roz-e-qayamat se baḌi hai
ik aane ka hai ik jaane ka hangam
ye qissa zindagi ka do-ghaḌi hai
nahin haTti tumhare chehre se zulf
ye shayad bosa lene par aḌi hai
hazaron daagh lakhon hasraten hain
hamare dil ki bhi basti baḌi hai
hua kya jild-e-ḳhak apna tan-e-zar
jahan ham the vahan miTTi paḌi hai
mare hain dar pe ham vo puchhte hain
ye kis ki laash raste men paḌi hai
jo dekhi hai nigah-e-mast-e-saqi
to bijli laḌkhaḌa ke gir paḌi hai
jo apna maal hoga ḳhair hoga
‘rashid’ ab to hamen dil ki paḌi hai
Leave a Reply