Poet
thoda hai jis qadar main padhun khat habib ka
dekha hai aaj ankhon se likkha nasib ka
ham mai-kashon ne nashshe men aise kiye saval
dam band kar diya sar-e-mimbar-khatib ka
sayyad ghaat men hai kahin baghban kahin
saara chaman hai dushman-e-jan andalib ka
apni zaban se mujhe jo chahe kah len aap
badh badh ke bolna nahin achchha raqib ka
ankhen safed ho gaiin jab intizar men
us vaqt nama-bar ne diya khat habib ka
qismat dubone laai hai dariya-e-ishq men
ai khizr paar kijiye beda gharib ka
vo be-khata hain un se shikayat hi kis liye
‘jauhar’ ye sab qusur hai apne nasib ka
Leave a Reply