Anwar Sadeed
divar par likha na paḌho aur ḳhush raho
kahta hai jo gajar na suno aur ḳhush raho
apna.iyat ka ḳhvab to dekho tamam umr
beganagi ka zahr piyo aur ḳhush raho
kanTe jo doston ne bikhere hain raah men
palkon se apni aap chuno aur ḳhush raho
baten tamam un ki suno gosh-e-hosh se
apni taraf se kuchh na kaho aur ḳhush raho
vo kaj-ada hain gar to na shikva karo kabhi
behtar hai zahr-e-ishq piyo aur ḳhush raho
shikva kiya zamane ka to us ne ye kaha
jis haal men ho zinda raho aur ḳhush raho
‘anvar-sadid’ haal agar mehrban nahin
maazi ko apne yaad karo aur ḳhush raho
Leave a Reply