KHushi Mahsus Karta Hun Na Gham Mahsus Karta Hun

Behzad Lakhnavi

ḳhushi mahsus karta huun na gham mahsus karta huun

magar haan dil men kuchh kuchh zer-o-bam mahsus karta huun

mohabbat ki ye nairangi bhi duniya se nirali hai

alam koi nahin lekin alam mahsus karta huun

miri nazron men ab baaqi nahin hai zauq-e-kufr-o-din

main ik markaz pe ab dair-o-haram mahsus karta huun

jo lutf-e-zindagani mil raha tha ghaTta jaata hai

ḳhalish jo dil men rahti thi vo kam mahsus karta huun

tumhare zikr par kab munhasir hai dil ki betabi

kisi ka zikr ho main chashm-e-nam mahsus karta huun

kabhi paata huun dil men ek hashr-e-dard-e-betabi

kabhi main apne dil men dard-o-gham mahsus karta huun

zaban par meri shikva aa nahin sakta zamane ka

ki har aalam ko main un ka karam mahsus karta huun

ye dil men hai jo ghabrahaT ye ankhon men hai jo aansu

is ehsan ko bhi bala-e-karam mahsus karta huun

ḳhushi ki mujh ko ab bahzad kuchh hajat nahin baaqi

ki gham ko bhi main ab un ka karam mahsus karta huun