Khalid Mubashshir
apna vajud main ne ab is tarah paak kar liya
jal kar tamam ishq men ḳhud ko hi ḳhaak kar liya
us ke liye to khel tha shoḳhi thi ya mazaq tha
main ne hi sab mo.amla andoh-nak kar liya
ab ke junun men saneha aisa bhi ho gaya ki bas
daman to ḳhair chhoḌiye siina hi chaak kar liya
us se na rabta rahe us ki ḳhushi isi men thi
us ki ḳhushi ke vaste ḳhud ko halak kar liya
ḳhvabon se vo nikal ke ab ankhon men jagne laga
main ne shadid ishq men vo inhimak kar liya
aisa tha dil ka saneha vo sang-dil bhi ro paḌa
‘ḳhalid’ ne jab zara se gham ka ishtirak kar liya
Leave a Reply