jo dast-e-ahl-e-mohabbat ko iḳhtiyar mile
gada ko phuul milen badshah ko ḳhaar mile
ye shahr-e-shishagaran hai yahan yahi hoga
ki sang ek mila aa.ine hazar mile
hamesha honTon pe us ke hansi nazar aa.i
hamari ankhon men aansu bhi be-shumar mile
ga.e the shahr se bahar udasiyan dhone
aur us safar men sab a.ine par ghubar mile
mila na dost bhi koi purani galiyon men
sab apne shahr men masruf-e-karobar mile
kabhi to jhank zara manzar-e-nigah se udhar
kabhi to aaqa koi mahv-e-intizar mile
batana us ko ki sab DhunDte rahe hain use
jo raste men kabhi tum ko ‘tajdar’ mile
Leave a Reply