Zakia Ghazal
amanat men ḳhayanat ho rahi hai
saliqe se tijarat ho rahi hai
nahin mahfuz koi apne ghar men
magar ghar ki hifazat ho rahi hai
sabhi ke ḳhvab ki ta.abir gham hai
to phir kis ko basharat ho rahi hai
hamin ne ḳhuun se sincha vatan ko
hamin se phir shikayat ho rahi hai
khaḌe hain rahnuma nilam-ghar men
bahut arzan siyasat ho rahi hai
ba-zahir mil rahe hain sab sabhi se
magar andar baghavat ho rahi hai
‘ghazal’ sachcha.i to mahngi paḌegi
tujhe kaise ye aadat ho rahi hai
Leave a Reply