Kafeel Aazar Amrohvi
ham ne jab koi bhi darvaza khula paaya hai
kitni guzri hui baton ka ḳhayal aaya hai
qafila dard ka Thahrega kahan ham-safaro
koi manzil hai na basti na kahin saaya hai
ek sahma hua sunsan gali ka nukkaḌ
shahr ki bhiiḌ men aksar mujhe yaad aaya hai
yuun liye phirta huun TuuTe hue ḳhvabon ki salib
ab yahi jaise miri ziist ka sarmaya hai
shahr men ek bhi avara nahin ab ke baras
mausam-e-lala-o-gul kaisi ḳhabar laaya hai
un ki TuuTi hui divar ka saaya ‘azar’
dhuup men kyuun mire hamrah chala aaya hai
Leave a Reply