Ghulam Rabbani Taban
dil vo kafir ki sada aish ka saman mange
zaḳhm pa jaa.e to kambaḳht namak-dan mange
lutf aa.e jo koi soḳhta-saman-e-bahar
ḳhaliq-e-rang se phir sho.ala-e-uryan mange
hasrat-e-did sar-e-bam tamasha chahe
ishq-e-betab sar-e-tur charaghan mange
raat zulfon se kare shoḳh andheron ka saval
raushni lauh-e-jabin se mah-e-taban mange
ik charagh aur sar-e-rah-guzar-e-bad sahi
chaar tinkon ke liye kaun gulistan mange
kam-nigahi ka taqaza hai ki phir jur.at-e-shauq
ḳhud tiri shoḳhi-e-andaz se unvan mange
dast-e-vahshat ke koi hausle dekhe ‘taban’
jab bhi mange to usi shoḳh ka daman mange
Leave a Reply