na.e safar ki lazzaton se jism o jaan ko sar karo
safar men hongi barkaten safar karo safar karo
udaas raat ke gudaz jism ko TaTol kar
kisi ki zulf-e-saya-dar ki girah men ghar karo
jo aankh ho to dekh tu sarab hi sarab hai
na e’tibar tishnagi men mauj-e-ab par karo
purani astin se purane but karo riha
na.i zamin par na.e ḳhuda ko mo’tabar karo
jamal-e-yar se karo kabhi nazar ko paak bhi
ḳhayal-e-yar se kabhi kabhi shaben sahar karo
Leave a Reply