Milta Hai Har Charagh Ko Saya Zamin Par

Hamdam Kashmiri

milta hai har charagh ko saaya zamin par

rahta nahin hai koi akela zamin par

har ek naqsh us ka hava le ke uḌ ga.i

khincha tha ham ne shauq ka naqsha zamin par

badle hue se lagte hain ab mausamon ke rang

paḌta hai asman ka saaya zamin par

gosha zara sa koi amaan ka kahin mile

ji tang ho gaya hai kushada zamin par

har ek mauj ruk si ga.i saans ki tarah

bahta nahin hai ab kahin dariya zamin par

vo jin ko mere ghar ka nishan bhi nahin mila

hairan hain mujh ko dekh ke zinda zamin par