barq sar-e-shaḳh-sar dekhiye kab tak rahe
ham ko yaqin-e-bahar dekhiye kab tak rahe
daman-e-gulchin men phuul bulbul-e-shaida malul
ruh-e-chaman sogvar dekhiye kab tak rahe
kitne na.e qafile manzilon se ja mile
baḳht men apne ghubar dekhiye kab tak rahe
dekhiye kab raah par Thiik se uTThen qadam
raat ki mai ka ḳhumar dekhiye kab tak rahe
mehnat-e-be-dam par nazm-e-kuhan barqarar
nazm-e-kuhan barqarar dekhiye kab tak rahe
ahl-e-junun ḳhuub hain vaqif-e-a.in-e-shauq
dil pe magar iḳhtiyar dekhiye kab tak rahe
dekhiye kab tak nazar bazm men bhaTka kare
hasrat-e-didar-e-yar dekhiye kab tak rahe
raat bhi murjha chali chand bhi kumhla gaya
phir bhi tira intizar dekhiye kab tak rahe
kashmakash-e-nang-o-nam dahr men jiina haram
naam ki ye jiit haar dekhiye kab tak rahe
dekhiye kab tak zamin zarron ki dhamki sahe
ziist ke ruḳh par ghubar dekhiye kab tak rahe
barsar-e-‘vamiq’ hazar gardish-e-lail-o-nahar
gardish-e-lail-o-nahar dekhiye kab tak rahe
Leave a Reply