har uzv-e-badan ek se hai ek tira khuub
siine ki safai se hai chehre ki safa khuub
qasid ke badan par alif-e-zakhm lage hain
khat ka mire likkha ye javab aap ne kya khuub
agah nahin hai koi ahval se mere
jo mujh pe guzarti hai vo jaane hai khuda khuub
ban ban ke dahan halqa-e-gesu-e-musalsal
luute hai tire bosa-e-ariz ka maza khuub
abtar hua jo sher kaha zulf ka teri
bandha koi mazmun hina ka to bandha khuub
madfun kiya teri hi gali men use akhir
paai tire ashiq ne pas-e-marg bhi ja khuub
do-char hi shab maah to rahta hai nahufta
muddat huui dekha nahin vo maah chhupa khuub
sharbat ke evaz suda-e-almas pilaya
ki aap ne bimar-e-mohabbat ki dava khuub
ruk ruk ke jo dam nikle hai mazbuh ka tere
kya khanjar-e-khun-khvar tira tez na tha khuub
maghrur na hona karam-e-yar pe ‘ghafil’
paega abhi dil ke lagane ki saza khuub
Leave a Reply