bazm-e-ḳhuban se uThe dar-o-rasan tak pahunche
aap hi aap mire paanv gagan tak pahunche
ek main hi tha jo sayyad ki jholi men gira
uḌ ga.e saare parinde jo chaman tak pahunche
sirf dil hi ko jalana to koi baat nahin
ishq ik aag agar hai to badan tak pahunche
bandishon hi ki numa.ish hai hayat-e-adam
ek dhage se bandhe aur kafan tak pahunche
umr kamtar hi se koshish thi musalsal jaari
sher apna bhi koi tarz-e-suḳhan tak pahunche
aḳhiri ek ye ḳhvahish hai mire siine men
ḳhaak jab meri uḌe apne vatan tak pahunche
sharm ka phuul main ankhon se teri chun lunga
is se pahle ki jhaḌe aur dahan tak pahunche
asmanon ko daba lega vo pairon ke tale
shauq insan ka gar us ki lagan tak pahunche
kya zarurat ki karen chal ke tavaf-e-duniya
fikr apni ye agar gang-o-jaman tak pahunche
soch lena tha tujhe itna ki kya hoga ‘nadim’
aaj ka sher agar tere sajan tak pahunche
Leave a Reply