raushni ban ke sitaron men ravan rahte hain
jism-e-aflak men ham surat-e-jan rahte hain
hain dil-e-dahr men ham surat-e-ummid-e-nihan
misl-e-iman ruḳh-e-hasti pe ayaan rahte hain
jo na DhunDo to hamara koi maskan hi nahin
aur dekho to qarib rag-e-jan rahte hain
har-nafas karte hain ik-tarfa tamasha paida
ham sar-e-dar bhi taz.in jahan rahte hain
aur bhi ahl-e-nazar hain kabhi dekho to sahi
ham bhi is shahar men ai kam-nazran rahte hain
dil ki dhaḌkan se mila un ka pata kuchh ham ko
kis ko ma.alum tha varna vo kahan rahte hain
vus.at-e-dasht nahin raas chaman-zadon ko
ham tire shahar ki janib nigaran rahte hain
ashk girte hain to kuchh dil ko sakun milta hai
haa.e vo log jo mahrum-e-fughan rahte hain
zindagi-bhar ka hai ahbab se is dasht men saath
misl-e-jan rahte hain ham ‘arsh’ jahan rahte hain
Leave a Reply