kuza-e-dard men ḳhushiyon ke samundar rakh de
apne honTon ko mire zaḳhm ke uupar rakh de
itni vahshat hai ki siine men ulajhta hai ye dil
ai shab-e-gham tu mire siine pe patthar rakh de
sochta kya hai use bhi mire siine men utaar
tujh se ye ho nahin sakta hai to ḳhanjar rakh de
phir koi mujh ko miri qaid se azad kare
mere andar se mujhe khinch ke bahar rakh de
jal raha hai jo mire ḳhana-e-jan ke andar
is diye ko bhi koi taq-e-hava par rakh de
ai saba de tu mire soḳhta-janon ko ḳhiraj
un ki turbat pe hi kuchh barg-e-gul-e-tar rakh de
murda ahraf bhi karte hain takallum ‘shahid’
apna kuchh ḳhun-e-jigar lafz ke andar rakh de
Leave a Reply