Meeraji
jaise hoti aa.i hai vaise basar ho ja.egi
zindagi ab muḳhtasar se muḳhtasar ho ja.egi
gesu-e-aks-e-shab-e-furqat pareshan ab bhi hai
ham bhi to dekhen ki yuun kyunkar sahar ho ja.egi
intizar-e-manzil-e-mauhum ka hasil ye hai
ek din ham par inayat ki nazar ho ja.egi
sochta rahta hai dil ye sahil-e-ummid par
justuju a.ina-e-madd-o-jazar ho ja.egi
dard ke mushtaq gustaḳhi to hai lekin muaaf
ab dua andesha ye hai kargar ho ja.egi
saans ke aghosh men har saans ka naghma ye hai
ek din ummid hai un ko ḳhabar ho ja.egi
Leave a Reply