nashat-e-dard ka dariya utarne vaala hai
main is se aur vo mujh se ubharne vaala hai
main us ki narm nigahi se ho gaya mayus
vo meri sada-dili se mukarne vaala hai
vo mere ishq men divana-var phirne lage
ye mo.ajiza to faqat farz karne vaala hai
mire ḳhayal ki parvaz se jo vaqif hai
vo ashna hi mire par katarne vaala hai
abhi abhi mire kuchh dost aane vaale hain
main sochta tha har ik zaḳhm bharne vaala hai
fasil-e-jism pe kuchh naqsh chhoḌ ja.ega
jo hadisa mire dil par guzarne vaala hai
bas is ḳhayal men bigḌa raha main barson tak
ab ek din men koi kya sudharne vaala hai
vo ban ke ziist mire paas aa gaya hai ‘amar’
ye vaqt mere liye ain marne vaala hai
Leave a Reply