Azhar Hashmi
jo daulat taraqqi-rasa.i bahut hai
to aapas men us se juda.i bahut hai
agar tujh men ulfat sama.i bahut hai
to sun lo yahan be-vafa.i bahut hai
kabhi dard maan ko nahin do ki is ki
har ek aah men gahri khaa.i bahut hai
ḳhuda ki raza hai na hasil kisi ko
ḳhuda ke liye par laḌa.i bahut hai
mohabbat luTa.i hai apno pe behad
magar choT apno se khaa.i bahut hai
haqiqat men vo daur kaafi hai mujh se
tasavvur men jo paas aa.i bahut hai
siyasat ne jashn-e-charaghan ke badle
gharibon ki basti jala.i bahut hai
har ik shai se le kar zamin-o-falak ko
mayassar ḳhuda ki ḳhuda.i bahut hai
agar mujh ko iman ki parvah na hoti
to duniya men ‘az.har’ kama.i bahut hai
Leave a Reply