Chandni Apne Sath Lai Hai

chāñdnī apne saath laa.ī hai

terī sūrat meñ raat aa.ī hai

ḳhud meñ ab ḳhud ko maiñ nahīñ miltā

is qadar mujh meñ tū samā.ī hai

ek din jism chhoḌ jā.egī

ruuh apnī nahīñ parā.ī hai

nahr meñ saaf kuchh bhī dikhtā nahīñ

aaj paanī pe kitnī kaa.ī hai

tujh ko ḳhat bhī likhe haiñ ḳhuun se aur

terī tasvīr bhī banā.ī hai

sar khule āyateñ haiñ rabb-e-jahāñ

tū kahāñ hai kahāñ ḳhudā.ī hai

is zamīñ se ai āsmāñ vaale

ab uThā le hameñ duhā.ī hai

Leave a Comment