badan men rang bhare lahlha rahe hain charagh
mahak rahi hai faza muskura rahe hain charagh
ujale Duube hue hain ghane andheron men
ajab safar hai bahut yaad aa rahe hain charagh
ḳhuda kare ki unhen ye milap raas aa.e
havaon se jo ta.alluq baḌha rahe hain charagh
surur-e-lams ka ab shaam lutf uTha.egi
ki din guzar gaya nazdik aa rahe hain charagh
tamam raat jale ab ye ḳhauf kaisa hai
hava-e-sub.h se daman bacha rahe hain charagh
vo de rahe hain hamen bujh ke bhi payam-e-hayat
hamen andheron men jiina sikha rahe hain charagh
ujale baanT rahe hain siyah raton ko
ye aur baat ki ḳhud ko jala rahe hain charagh
visal-o-hijr ke mausam guzar ga.e ki ‘bashir’
jala rahe hain na ham ab bujha rahe hain charagh
Leave a Reply