Tumhaari Yaad Ki talKHi Abhi Bachi Hui Hai

tumhārī yaad kī talḳhī abhī bachī huī hai

so ik sharāb kī botal na.ī rakhī huī hai

na āstīn meñ ḳhanjar na lab pe shīrīnī

ye kaise aql ke dushman se dostī huī hai

vo phuul kis ke shabistāñ meñ khil rahā hogā

jo mere kamre meñ ḳhushbū bharī bharī huī hai

abhī se falsafa-e-reg-zār kī bāteñ

abhī to ishq ke maktab meñ hāzirī huī hai

vo ek shaḳhs jo dahlīz tak nahīñ aatā

usī ke naam kī shohrat galī galī huī hai

Leave a Comment