Salam Machhli Shahri
kaash tum samajh saktin zindagi men sha.er ki aise din bhi aate hain
jab usi ke parvarda chand us pe hanste hain phuul muskurate hain
ab to mere shah-pare jo tum hi se the mansub yuun jhalak dikhate hain
duur ek mandir men kuchh diye muradon ke jaise jhilmilate hain
tum ne kab ye samjha tha main ne kab ye socha tha zindagi ki rahon men
chalte chalte do raahi ek moḌ par aa kar ḳhud hi chhuT jaate hain
kaam husn-karon ka ansuon ki zau de kar kuchh kanval khila dena
maut husn-karon ki jab vo ḳhud shab-e-gham men ye diye bujhate hain
tez-tar hava.en hain maut ki faza.en hain raat sard o jamid hai
ahmarin sitare bhi vaqa.i divane hain ab bhi muskurate hain
alvida ai meri shahkar nazmon ki zar-nigar shahzadi
mavara-e-ulfat bhi kuchh na.e taqaze hain jo mujhe bulate hain
Leave a Reply