Zaheer Kashmiri
kis ko mili taskin-e-sahil kis ne sar manjdhar kiya
us tufan se guzre jis ne nadi nadi ko paar kiya
ai farzano! divanon ke jazba-e-dil ki qadr karo
un ki ek nazar ne atish atish ko gulzar kiya
ranj-e-mohabbat ranj-e-zamana donon ham se ḳha.if hain
ham ne soch samajh kar dil ko sargarm-e-paikar kiya
sahra sahra ham ne nok-e-ḳhar se talve sahla.e
mahfil mahfil ham ne apni vahshat ka iqrar kiya
un se kah do samne aa kar apne jalve aam karen
ḳhalvat-e-naz men chhup na sakenge ham ne agar israr kiya
ham ne apne ishq ki ḳhatir zanjiren bhi dekhin hain
ham ne un ke husn ki ḳhatir raqs bhi zer-e-dar kiya
basti basti aaj hamari sa.i-e-vafa ki shohrat hai
ham ne ‘zahir’ ik aalam ko paband-e-nigah-e-yar kiya
Leave a Reply