kuchh na paa.i dil ne taskin aur kuchh paa.i to kya
aisi surat se tiri surat nazar aa.i to kya
ek dushman ke kahe par naaz vo bhi is qadar
apne matlab ko kisi ne aap ki gaa.i to kya
hosh aana tha ki vo ḳhase sitamgar ban ga.e
haa.e ri qismat ki un ko aql bhi aa.i to kya
o jafa-pesha shagufta ḳhatiri hai aur shai
yuun hansi aane ko rone men hansi aa.i to kya
aap apne dil se puchhen aap hi sochen zara
meri aahon men agar tasir bhi aa.i to kya
mere lashe par agar tashrif bhi laa.e to hech
ba.ad mere un ko meri yaad bhi aa.i to kya
apni aadat se vo baaz aa jaa.en mumkin hi nahin
kahne-sunne se ghaḌi-bhar ko haya aa.i to kya
kuchh na kuchh aghyar ne paTTi paḌha.i hai zarur
tum ne khane ko mire sar ki qasam khaa.i to kya
tha jo kuchh taqdir ka hona vo ho kar hi raha
karne valon ne jo ki bhi chara-farma.i to kya
be-vafaon men to kuchh ginti nahin teri tarah
ham ko kahti hai agar maḳhluq sauda.i to kya
ai safi’ tark-e-ta.alluq kar ke itrate ho kyuun
umr-bhar men ye hui hai tum se dana.i to kya
Leave a Reply