Poet
javani ki halat guzar jaegi
chadhi hai jo sar par utar jaegi
jidhar ko miri chashm-e-tar jaegi
udhar kaam dariya ka kar jaegi
zamane ki iiza ka shikva na kar
guzarte guzarte guzar jaegi
khulega tujhe ishq-bazi ka haal
ye hirs-e-hava jabki mar jaegi
mire jism-e-khaki se ho ke juda
ye ruh-e-ravan phir kidhar jaegi
mire naghmon se andalib-e-chaman
kahan ud ke tu musht-e-par jaegi
tavajjoh tiri o but-e-bevafa
mira kaam akhir ko kar jaegi
bahar-e-chaman jabki hogi khizan
miri vahshat-e-dil kidhar jaegi
agar jazba-e-dil pe qaabu raha
shab-e-vasl ki phir thahar jaegi
khinchi hai jo tegh-e-mohabbat dila
yahi ek din tere sar jaegi
chadhi hogi kachche ghade ki jise
utarte utarte utar jaegi
qimar-e-mohabbat men gar aah ki
ye jiiti hui baazi har jaegi
miri marg aisi hai ai ‘muntahi’
ki jis ki adam tak khabar jaegi
Leave a Reply