Sardar Saleem
ek hi zinda bacha hai ye nirala pagal
jhuuT ke shahr men sach bolne vaala pagal
hathon men phuul liye aa.e hain sab log jahan
le ke aaya hai vahan paanv ka chhala pagal
us ki ankhon men ajab nuur tha dana.i ka
tum ne mahfil se jise kah ke nikala pagal
dhuup hai phaili hui sharq se ta-gharb magar
banTta phirta hai duniya ko ujala pagal
jis men rakkhe huun mohabbat ke ḳhazane bhar kar
is tijori ko lagate nahin taala pagal
kaun samjha.e tiri sar-phiri kashti ko ‘salim’
ḳhunin dariya se paḌa hai tira paala pagal
Leave a Reply