Vishal Khullar
ek lamha Thahar gaya mujh men
vaqt jaise ki qaid tha mujh men
kitne ehsas bhar gaya mujh men
rakh gaya kaun aa.ina mujh men
kitne suraj na.e ubhar aa.e
asman jab bikhar gaya mujh men
saare manzar mire isharon par
bas ga.i hai tiri ada mujh men
kaun sahra men bas gaya aa kar
peḌ ugne laga ghana mujh men
main kahan raat ka musafir tha
chand ḳhud aa ke bas gaya mujh men
ai hava tez-gam mat chalna
jal raha hai kahin diya mujh men
Leave a Reply