Roohi Kanjahi
har talḳh haqiqat ka iz.har bhi karna hai
duniya men mohabbat ka parchar bhi karna hai
be-ḳhvabi-e-paiham se bezar bhi karna hai
basti ko kisi surat bedar bhi karna hai
dushman ke nishane par kab tak yunhi baiThenge
ḳhud ko bhi bachana hai aur vaar bhi karna hai
shaffaf bhi rakhna hai gulshan ki fazaon ko
har barg-e-gul-e-tar ko talvar bhi karna hai
kanTon se ulajhne ki ḳhvahish bhi nahin rakhte
phulon se mohabbat ka iz.har bhi karna hai
is jurm ki nauiyyat ma.alum nahin kya hai
inkar bhi karna hai iqrar bhi karna hai
hone bhi nahin dena bohran koi paida
moqif pe hamen apne israr bhi karna hai
tai lamhon men kar Dalen sadiyon ka safar lekin
is raah ko ai ‘ruhi’ hamvar bhi karna hai
Leave a Reply