Muneer Niyazi
aa gai yaad shaam dhalte hi
bujh gaya dil charagh jalte hi
khul gae shahr-e-gham ke darvaze
ik zara si hava ke chalte hi
kaun tha tu ki phir na dekha tujhe
mit gaya khvab aankh malte hi
khauf aata hai apne hi ghar se
mah-e-shab-tab ke nikalte hi
tu bhi jaise badal sa jaata hai
aks-e-divar ke badalte hi
khuun sa lag gaya hai hathon men
chadh gaya zahr gul masalte hi
Leave a Reply