Najma Shaheen Khosa
dard musafir Thahar gaya tha akhiyon ki hairani men
sirf mohabbat bahti thi aur saath ye ashk ravani men
kaise hua aur kab ye hua kuchh ḳhabar nahin thi dil ko to
ek mohabbat ja soi thi vahshat men virani men
dard ki shiddat aur baḌhi thi shahr-e-vafa ki shamon men
aur virani baiTh ga.i thi in akhiyon ke paani men
is hasti ke andhiyaron ne baḳht ko aise ghera tha
apni sada tak ujaḌ ga.i thi dil ki nauha-ḳhvani men
ek suḳhnavar ke lafzon ne mujh ko yuun barbad kiya
lutf sama.at ko milta hai ab to zahr-afshani men
us ne anjani si baten kiin to phir ye ilm hua
ham to daana samajh rahe the ḳhud ko baḌi nadani men
Leave a Reply